A Asociación de Empresarios da Pobra levou a cabo durante a campaña de San Valentín unha nova acción de dinamización comercial: un Sorteo Exprés a través de Instagram, unha iniciativa pensada para fomentar a participación da clientela, dar visibilidade ao comercio local e animar o ambiente nas rúas da vila durante esta data tan especial.
A acción desenvolveuse de maneira sinxela e participativa a través do perfil de Instagram da asociación. As persoas participantes podían optar ao premio seguindo os pasos indicados na publicación: comentar na publicación do sorteo e subir unha story no photocall mencionando á Asociación de Empresarios da Pobra.
Ademais, instalouse un photocall temático na Praza de Maura, dispoñible ao longo da xornada do 14 de febreiro en horario de 12:00 a 20:00 horas, que animou a veciños e visitantes a achegarse, sacar fotografías e compartilas nas redes sociais.
A iniciativa contou cunha moi boa acollida por parte do público, xerando numerosas interaccións nas redes sociais e unha participación destacada ao longo da xornada. O photocall converteuse nun punto de encontro moi animado, no que participaron parellas, grupos de amigos e familias que quixeron sumarse ao ambiente festivo de San Valentín.
Este tipo de accións contribúen a dinamizar a actividade comercial, crear ambiente nas rúas e reforzar o vínculo entre o comercio local e a clientela.
Con iniciativas coma esta, a entidade continúa apostando por campañas que combinan a dinamización nas rúas coa presenza nas redes sociais, favorecendo a visibilidade do comercio de proximidade e animando a veciños e visitantes a elixir o comercio da Pobra.
0 comentarios